Түркмөнстанда жарандар ак түстөгү беткап тагынып жүрүүгө милдеттендирилүүдө

Түркмөнстандын Ашхабад шаарында, Лебап жана Балкан облустарында жарандар ак түстөгү беткаптарды гана тагынып жүрүүгө милдеттендирилди. Бул тууралуу Turkmen.news өз булактарына таянуу менен билдирди.

Ал ортодо түркмөн бийлиги өлкөдө коронавирус жок деген пикиринен кайта элек.

Лебап облусунун административдик борбору болгон Түркмөнабад шаарында аткаминерлер менен окуучулар ак түстөгү беткап тагынууга милдеттендирилди. 6-18-ферваль аралыгында текшерүү иштери жүрөт, кара же түстүү беткап үчүн мугалимдер менен директорлоргө сөгүш жарыяланат.

Ушундай эле талап Балкан облусунун Түркмөнбашы шаарындагы мектеп жана бала бакчаларга да киргизилди. Мекеме кызматкерлерине балдарды тыкыр көзөмөлдөөгө тапшырма берилип, ата-энелер менен чогулуштар өткөрүлдү. Айрым жерлерде медициналык гана беткап колдонулушу керектиги айтылды.

Ашхабадда былтыр декабрдан бери эле МАИ кызматкерлери айдоочуларды токтотуп, ак беткап тагынып жүрүүнү талап кыла башташкан. Январдан тарта жөө жүргүнчүлөргө, студенттерге жана окуучуларга да ушундай эле талап коюлуп жатат. “Туура эмес беткап” тагынгандарга 50 манат же 14,3 доллара айып пул салынууда.

2021-жылы Түркмөнстанда мамлекеттик мекемелердин автоунааларынын баары ак түстө болушу керек деген жаңы эреже киргизилген. Түркмөн бийлиги күңүрт түстөгү унааларды пайдаланууга 2017-жылы декабрда бир катар чектөөлөрдү киргизген.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген

This site uses Akismet to reduce spam. Learn how your comment data is processed.