Парламент Бейшеналиевди билим берүү жана илим министри кызматына дайындоого макулдук берди

Бүгүн, 16-февралда Жогорку Кеңештин жыйынында депутаттар Алмазбек Бейшеналиевди билим берүү жана илим министри кызматына дайындоого макулдук берүү маселесин карады.

Талапкер тууралуу маалыматты президенттин жана министрлер кабинетинин Жогорку Кеңештеги туруктуу өкүлү Алмасбек Абытов берди.

Талкуунун жүрүшүндө депутат Чыңгыз Айдарбеков мамлекеттин өнүгүүсү билим берүүнүн сапатынан көз каранды экенин белгиледи. Анын айтымында, билим берүү тармагындагы бардык мыйзамдарды талдап, учурдун талабына жооп берген документти иштеп чыгуу, билим берүү мекемелерин аккредитациялоо жана лицензиялоо процедурасын жөнөкөйлөтүү зарыл. Билим берүү жана илим министри кызматына талапкер билим берүү жөнүндө мыйзам долбоору коомчулуктун кеңири талкуусунан өтөрүн айтты.

Депутат Чыңгыз Ажибаев Билим берүү жана илим министрлиги мектеп программасын кайра карап чыгышы керектигин белгиледи. Депутат Нурбек Алимбеков тармактык министрлик ар бир облуста мектеп куруу зарылдыгын талдап, ошонун негизинде билим берүү мекемелеринин курулушун пландоо керектигин белгиледи. Билим берүүнүн сапатын жогорулатуу маселесин депутат Алтынбек Сулайманов да көтөрдү.

Талкуунун жыйынтыгында Жогорку Кеңеш Алмазбек Бейшеналиевди билим берүү жана илим министри кызматына дайындоого макулдук берди.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген

This site uses Akismet to reduce spam. Learn how your comment data is processed.