Орусия Донецк менен Луганск жикчил “республикаларын” тааныды

21-февралда Орусия президенти Владимир Путин орусиялыктарга видеокайрылуу жасап, Украинанын чыгышындагы жикчилдердин аймактарын көз карандысыз мамлекет катары тааный турганын жарыялады.

Мындан соң телеканалдардан “Донецк Элдик Республикасы” менен “Луганск Элдик Республикасын” көз карандысыз мамлекеттер катары таануу, мындан тышкары достук жана кызматташтык келишимдери жөнүндө жарлыктар көрсөтүлдү.

Путин Украинаны “Ленин түзгөн”, “жеке мамлекеттүүлүгү жөнүндө тарыхы жок”, Орусиянын тарыхый облустарынан куралган мамлекет катары атады.

“Большевиктер тарабынан түзүлгөн Украина чыныгы декоммунизацияны кааласа, Орусия аны уюштуруп берет”, – деди Путин.

Путин Украина Орусияга коркунуч жараткан душман өлкө экенин айтты. Анын билдиришинче, эгер Украина НАТОго кошулса, гиперүндүү ракеталар Орусияга беш мүнөттө жете алат.

“Эгер муну биздин бабаларыбыз укса, алар ишенишмек эмес. Биздин дагы ишенгибиз келбейт”, – деп кошумчалады Путин.

Мунун алдында Орусиянын Коопсуздук кеңеши президент Владимир Путиндин төрагалыгы астында Украинанын чыгышындагы жикчилдердин “Донецк Элдик Республикасы” жана “Луганск Элдик Республикасы” түзүлүштөрүн таануу маселесин караган. Анын катышуучулары Путинден аталган аймактардын көз карандысыздыгын таанууну бир ооздон өтүнүшкөн.

Орусиячыл жикчилдер 2014-жылдын апрель айында эки облустун аталышын “Донецк Элдик Республикасы” жана “Луганск Элдик Республикасы” деп жарыялашкан. Москва Украинага карата агрессияны жана жикчилдерди колдогонун төгүндөп келген Донбасста жайгашкан эки аймактын көз карандысыздыгын эч ким тааныган эмес.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген

This site uses Akismet to reduce spam. Learn how your comment data is processed.