Тажикстанда чегиртке каптаган аянт 87 миң гектарга жетти

Тажикстанда чегиртке каптаган айыл чарба жерлеринин аянты 87 миң гектарга жетти.

Өлкөнүн Айыл чарба министрлигине караштуу «Чегирткеге каршы күрөшүү боюнча экспедиция» мекемесинин адистери быйыл өлкө боюнча чегиртке каптаган жерлердин жалпы аянты 115 миң гектарга жетиши мүмкүн экенин эскертишүүдө. Алардын айтымында, бул былтыркыга салыштырмалуу 13 миң гектарга көп болот.

«Азыр айыл чарба жерлерине дары чачылып жатат. Чегирткеге каршы күрөшүүгө ондогон техника, аэрозоль станоктору жана башка каражаттар тартылды», — деди мекеме жетекчисинин орун басары Ахмаджон Муминжонов.

25-майда өлкө президенти Эмомали Рахмон чегиртке көп каптап жаткан Хатлон облусундагы Пянж районунун жетекчиси менен телефондо сүйлөшүп, айыл чарба жерлерин дарылоону күчөтүү тапшырмасын берген.

Чегирткелер тажик дыйкандарына канча зыян алып келгени боюнча расмий статистика жок. Өлкөнүн айыл чарба тармагы жыл сайын жаз жана жай мезгилдеринде чегирткелерден жабыр тартып келет.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген

This site uses Akismet to reduce spam. Learn how your comment data is processed.