Садыр Жапаров Ысык-Көлдү сүзүп өткөн Владислав Шуликого жарым миллион сом бөлдү

Президент Садыр Жапаров бүгүн, 8-сентябрда, кыргызстандык суучул, спорт чебери Владислав Шулико менен жолугушту. Бул тууралуу президенттин басма сөз кызматынан билдиришти.

Анда маалымдалгандай, жолугушууда мамлекет башчысы Ысык-Көлдү узунунан 181 чакырым сүзүп өтүп, дүйнөлүк рекорд койгон Владислав Шуликонун эрдигин дагы бир жолу белгиледи.

«Кандай гана кыйынчылык болбосун өзүңө ишенүү жана максатыңа жетүү керектигин өз мисалыңда көрсөттүң. Буга чейин мындай эч ким кылган эмес. Бүт өлкө сенин сүзгөнүңдү байкап жана абдан  кабатырланып атты», – деди Садыр Жапаров.

Ал бул сүзүп өтүү  Кыргызстандын көз карандысыздыгынын  30 жылдыгына белек болгонун белгиледи.  Муну менен Владислав Шулико өсүп келаткан муунга жакшы үлгү көрсөтүүдө.

Мындан сырткары президент Владислав Шуликонун жетишкендиги жөнүндө Гиннестин рекорддор китебине билдирме берүү үчүн  каражаттын жетишсиздигине байланыштуу  кыйынчылыктардан кабардар экенин билдирди.

Садыр Жапаров мамлекет өз тарабынан активдүү жаштарды колдоого алып жана спорттук жетишкендиктерге дем берүүгө милдеттүү экенин белгиледи. Буга байланыштуу Президент өзүнүн фондунан Владислав Шуликого 500 миң сом бөлдү.

Өз кезегинде, суучул Владислав Шулико Мамлекет башчысына моралдык жана материалдык колдоосу үчүн чын дилинен  ыраазычылык билдирди. Анын айтымында, ага максатына жетүүсүнө Кыргызстанды дүйнө жүзүнө таанытууга болгон каалоосу шыктандырган.

«Мен өз алдыма ушундай татаал тапшырма, максат  коюп жана аны ишке ашырарыма өзүм анчалык ишенген жокмун. Бирок, сүзүп баштагандан кийин мен токтоно албай, өзүмө рекорд коем деп сөз бердим. Анткени Президент өзү мага ишенди, бүт өлкө мага ишенип, күтүп атты. Биздин эл өтө ынтымактуу», – деп белгилеп, ал элге ыраазычылыгын билдирди.

Жолугушуу соңунда мамлекет башчысы Владислав Шуликого бекем ден соолук жана жаңы спорттук жетишкендиктерди каалады.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген

This site uses Akismet to reduce spam. Learn how your comment data is processed.