Оштун экинчи Эл аралык аэропортун курууга 2 мамлекет кызыктар болууда

Оштун аэропортун жылдыруу боюнча көп жылдан бери сөз болуп келген. Акыркы убактарда иш активдүү жүрө баштады. Облустук администрациянын маалымат кызматынан кабарлашкандай, аба майданды курууга Түркия жана Кытай мамлекеттери кызыктар болууда.

Бүгүн, 18-июнда, Кытайдын “Бир алкак бир жол” ири долбоорунун туруктуу комитетинин төрагасы Ге Чжили, КР Өкмөтүнүн Ош облусундагы өкүлү Узарбек Жылкыбаев менен жолугуп, аэропортту курууга даяр экендиктерин билдирди. Ал эми ушул жылдын башында Түркия тарап да каржылоо ниетин билдирген болчу. Азырынча кыргыз тарап кимге токтолгону тууралуу маалымат тарата элек.

Жаңы аба майданды куруу үчүн Өкмөттүк жана жергиликтүү деңгээлдеги пландоо, анализдөө иштери аягына чыгып калды. Ошондой эле Өкмөттөн аэропорт салына турган 500 гектар жерди трасформациялоо иши да аягына чыгаары күтүлүүдө.

Мурда маалымдалгандай, аба ырайы бузулганда эле, аэропорттун аймагын туман каптап, учактар токтоп калып, жүргүнчүлөргө бир топ ыңгайсыздыктарды жаратып келет. Ал эми жаңысы түшөт делген Кара-Суу районунун Мады айылы тарабында андай болбойт, анткени ал жак кайрак болгондуктан, туман көп боло бербейт деп түшүнүрүшөт.

Оштун жаңы аба майданын куруу аракети жүрүп жатканы менен, азыркы майданда дагы деле реконструкция иштери жүрүп келет. Тагыраагы учуп жаткандарды узатууга келгендер үчүн атайын жай курулуп, учуп-конуу тилкелери узартылды жана млн.догон каражаттарга заманбап болуп жаңыртылды.

Ош аба майданынан борбор калаага жана чет мамлекеттерге күнүнө 15 учак каттамга чыгып турат.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген