Ош, Бишкек шаарларында “Кул болбо!” аттуу акция өттү

Бишкекте «Биримдик» партиясынын төрагасы Марат Аманкуловдун эгемендикке байланыштуу сөздөрүнө каршы «Кул болбо!» аталышындагы акция өттү. Акциянын катышуучулары «Эл, эрк, эркиндик!», «Маңкурт болбо!», «Саткындар кетсин!» деген ураандарды кыйкырып турушту.

«Биримдик» партиясынын төрагасы Марат Аманкуловдун эгемендикке байланыштуу сөздөрүнө каршы «Кул болбо!» деп аталган нааразылык акциясы Ош шаарында да уланды. Чогулгандар «Кул болбо!», «Маңкурт болбо!», «Бөтөн жерде султан болгуча, өз жериңде ултан бол» деген чакырыктар жазылган кагаздарды көтөрүп чыгышты.

Оштогу акция Ак-Буура дарыясынын үстүндөгү подиумдан жүрүш менен башталып, Алымбек Датка эс алуу багында уланды.

Бишкек шаарындагы акция эки саатка созулду. «Кул болбо!» аттуу акцияда «Аманкулов, чык эшикке», «Эгемен Кыргызстан», «Кыргыз жери кол тийгис», «Маңкурт болбо», «Эгемендүүлүк, элге!», «Саткындар кетсин!» деген ураандар жаңырды.

Акциянын катышуучулары Аманкуловду жоопкерчиликке тартууну өтүнүштү. Парламенттик шайлоого катышып жаткан «Ата Мекен», «Бир Бол», «Реформа», «Чоң казат» партияларынын өкүлдөрү да сөз алып, саясий жарыштагы атаандашынын кебин айыпташты.

Митингге болжол менен 400-500дөй киши катышты. Эркиндик бульварынан жүрүш катары башталган акция саат 14:00дө аяктады.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген