Муфтият жамандоого кабылганын айткан мушкердин окуясына тиешеси жоктугун билдирди

Кыргызстан мусулмандарынын дин башкармалыгы (муфтият) “жамандоого кабылгандыктан” өлкөдөн чыгып кетүүгө ниеттенип жатканын айткан кыргызстандык мушкер Рафаэль Физиевдин окуясына эч кандай тиешеси жок экенин билдирди.

14-октябрда муфтияттын басма сөз катчысы Максат Атабаев “Азаттыктын” суроолоруна жооп берип жатып Физиевдин айткандары “чындыкка дал келбейт” деп айтты.

“Муфтият бирөөнү коркутуу менен алектенбейт, өзүнө жүктөлгөн уставдык миссиясын аткарат. Түшүндүрүү, агартуу, элибизге динибиздин баалуулуктарын жеткирүү менен алектенет”, – деген Атабаев Физиевдин да, Токтомушевдин да сөздөрүнө баа берүүнү туура көрбөсүн кошумчалады.

Физиев мындан ары таймаштарга Кыргызстандын атынан катышпай турганын жана үй-бүлөсү менен өлкөдөн көчүп кетүүнү пландап жатканын 13-октябрда “Инстаграм” баракчасы аркылуу билдирген.

Мындай чечимин ал Кыргызстандын муфтиятынын жана интернеттеги социалдык түйүндөрдүн колдонуучуларынын кысымы менен түшүндүргөн.

“Мен эч качан диний үгүттөөчү болгон эмесмин. Мен “Инстаграмдын” миллиондогон колдонуучулары сыяктуу эле өзүмдүн күнүмдүк жашоомду көрсөтүп турам. Ар бир адамдын жеке пикири болот жана светтик мамлекетте ар бир адам мыйзам чегинде каалаганын кыла алат. Бүгүнкү күндө мен муфтияттын көп жамандоосуна кабылдым. Ошонун айынан мага жана үй-бүлөмө катуу кысым болууда”, – деди ал.

7-октябрда “Ютубда” Кыргызстандын мурдагы муфтийи Максатбек Токтомушевдин спортчунун диний темада жазганын сындаган видеосу чыккан.

Ал Физиев Ирактагы Кербела шаарын Мекке жана Медина шаарларынан кийинки эле ыйык шаар деп атаганы жана буга шариат кандай карай турганы жөнүндөгү суроого жооп берип жатып спортту ишеним менен аралаштырбоого чакырган.

Ошону менен катар Токтомушев Борбор Азия эли сүннөттү бекем кармангандар экенин эскерткен:

“Мындай чакырык таштаган туура эмес. Бул дин аралык кичине бир пикир келишпестикке алып келип коет. Ошондуктан, бул жакшы спортчубуз, Кудай кааласа, туура түшүнүк менен кабыл алып, мындай чакырыгын токтотот деген ойдомун. Токтотуш керек. Өзүнүн жакшы карманганы болсо мейли, эч нерсе эмес. Каабага барса сезим такыр башка да”.

Физиевдин билдирүүсү интернет-колдонуучулардын арасында кызуу талкуу жаратууда.

UFC рейтингинде спортчу жеңил салмак боюнча 14-орунда турат.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген

This site uses Akismet to reduce spam. Learn how your comment data is processed.