ИИМ: Баткендин бардык райондорунда жана айылдарында кырдаал туруктуу

2021-жылдын, 2-майына карата Баткен облусунун бардык райондорунда жана айылдарында, мамлекеттик чек арасынын кыргыз-тажик тилкесинде кырдаал туруктуу. Бул тууралууКР ИИМдин басма сөз кызматы билдирет.

Маалыматка ылайык, чек арага жакын айылдардагы коопсуздук абалы толугу менен көзөмөлдө. Азыркы мезгилде чек арага чектеш аймактарда абал тынч. Түнкүсүн ок атышуулар жана башка окуялар катталган жок. Милиция кызматкерлери тарабынан блок посттор коюлуп, чек арага чектеш аймактардагы жергиликтүү элге түшүндүрүү иштери жүргүзүлүп жатат.

“Куралдуу кагылышуунун каардуу күндөрүн башынан өткөргөн Баткен облусунун чек арага чектешкен бардык айылдары толугу менен кайтарууга алынып, блок посттор коюлуп, милициянын кайгуул топтору коомдук тартипти сактоо ишмердүүлүгүн жүргүзүүдө”, – деп айтылат маалыматта.

Алсак, Баткен облусундагы Баткен району боюнча Аксай, Көк-Таш, Самаркандек, Орто-Боз айылдарында, Сүлүктү шаары боюнча Кызыл-Бел участкасында коюлган блок посттордо милициянын кайгуул топтору, Кызыл-Кыя шаары боюнча коюлган блок посттордо милициянын беш кайгуул тобу, Кош-Булак участкасында, Сүлүктү шаарында милициянын эки кайгуул тобу, Кадамжай районунун Бүргөндү, Кадамжай айылдарында коюлган эки блок постто жана Уч-Коргон, Айдаркен, Бүргөндү айылдарында милициянын үч кайгуул тобу, Лейлек району боюнча Исфана шаарында коюлган блок постто, Кулуңду, Интернационал, Арка-1, Арка-2, Достук , Жаштык, Ак-Арык, И. Разаков айылдарында милициянын кайгуул топтору, Баткен шаары боюнча Кызыл-Жол айылында коюлган блок постто, Баткен шаарынын аймагында төрт милициянын кайгуул тобу коомдук тартипти сактоо жана ар кандай укук бузууларга жол бербөө максатында түнкү жана күндүзгү күзөттө күчөтүлгөн тартипте кызмат өтөп жатышат.

Ошондой эле Баткен районунун Ак-Татыр айыл аймагындагы Жака-Өрүк участкасы аркылуу өтүүчү Ош-Исфана автожолу толугу менен кыргыз милициясы тарабынан катуу көзөмөлгө алынып, жергиликтүү тургундар менен биргеликте коопсуздукту сакташып, ар кандай тартип бузууларга жол беришкен жок.

Милициянын бардык кайгуул топтору ыктыярдуу элдик кошуундардын, айыл, квартал башчылары менен биргеликте жүргүзүлүп жатат. Ошондой эле жергиликтүү элдик коопсуздугун камсыздоо максатында жалпы милиция кызматкерлери ички аскерлер жана башка күч түзүмдөр менен биргеликте коомдук коопсуздукту көзөмөлдөшүүдө.

Бул аймактарда жашаган жергиликтүү тургундардын коопсуздугун сактоону ИИМдин биринчи орун басары Сүйүн Өмүрзаков толугу менен көзөмөлгө алып, укук коргоо органдарынын ишмердүүлүгүн координациялап, жергиликтүү бийлик органдары, ыктыярдуу элдин кошуундар менен биргеликте кайгуул топторун уюштуруп, эл арасында түшүндүрүү иш-чараларын жүргүзүүнү колга алган.

Ал эми Баткен облусундагы коомдук тартипти сактоо иш-чараларын толугу менен ички иштер министри Улан Ниязбеков өз көзөмөлүнө алып, коомдогу болуп жаткан терс көрүнүштөрдү жөнгө салууда тийиштүү тапшырмаларды берүүдө.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген

This site uses Akismet to reduce spam. Learn how your comment data is processed.