Бишкекте улуттук олимпиадалык команданын мүчөлөрүн тосуп алуу салтанаты өттү

7-август күнү, Садыр Жапаров, борбордук Ала-Тоо аянтында Токио шаарында өткөн жайкы олимпиада оюндарынан кайтып келген улуттук курама команданын мүчөлөрүн сый-урмат менен тосуп алуу салтанатына катышты. Бул тууралуу президенттин басма сөз кызматынан билдиришти.

Олимпиадачыларды «Манас» эл аралык аэропортунда президенттин администрациясынын Жетекчиси Сүйүнбек Касмамбетов жана министрлер кабинетинин төрагасынын орун басары Жылдыз Бакашова тосуп алышты.

Салтанаттуу жолугушуудан кийин чакан пресс-конференция өткөрүлүп, анда журналисттер спортчулар менен машыктыруучуларга коомчулукту кызыктырган суроолорду берип, жооп алышты.

Мамлекет башчысынын катышуусу менен негизги майрамдык иш-чаралар борбордун Ала-Тоо аянтында өттү. 

Өлкөнүн намысын коргогон спортчуларга жана машыктыруучуларга ыраазычылык билдирүү үчүн Мамлекет башчысы менен бирге миңдеген кыргызстандыктар келишти. 

Садыр Жапаров команданын мүчөлөрү менен машыктыруучуларын жакшы маанайда тосуп алып, аларды Токиодогу жайкы олимпиада оюндарына ийгиликтүү катышып, Мекенине жеңиш менен кайтып келиши менен куттуктады. 

Анда, төмөнкү сөздөр айтылды:

«Олимпиадалык медалдарды, спорттук мыкты жыйынтыктарды, спортчуларыбыздын жетишкендиктерин өлкөбүздүн эгемендүүлүгүнүн 30 жылдыгына татыктуу белек деп эсептеймин. Сиздер бардык кыргызстандык  күйөрмандардын үмүтүн актап, элибизди кубанычка  бөлөдүңөр! 

Олимпиада оюндарында дүйнөнүн 200дөн ашуун өлкөсүнөн 12 миңден ашык спортчу катышууда. Ал эми Кыргызстандан 16 спортчу катышып,  күрөш боюнча улуттук командабыз 3 медаль утуп алды. Кыргызстандын кыз-келиндер күрөшүнүн тарыхында биринчи жолу Олимпиада оюндарынын эки медалына ээ болдук. Баатыр энелерибиз Кыз Сайкалдын, Жаңыл Мырзанын руху тирүү экен, алардын кайратын, баатыр мүнөзүн кыздарыбыз көтөрүп жүргөн экен, эчен ирет Азия чемпионаттарын, дүйнө биринчиликтерин утуп жүргөн Айсулуу Тыныбекова Токио Олимпиадасынын күмүш медалын, ал эми Мээрим Жуманазарова коло медалын жеңип алып, жалпыбызды сүйүнтүп отурушат. 

Күрөш өнөрүнүн эң мыкты үлгүсүн көрсөтүп, чеберчилиги менен көпчүлүктү суктандырган Акжол Махмудовду өзгөчө белгилегим келет!  Уул-кыздары үчүн күйгөн жүз миңдеген мекендештерибиз мелдешүүлөрдү түз ободо көрүп, бүтүндөй Кыргызстан силерди сүрөп турду. Мен да финалдык беттештерди үй-бүлөм менен чогуу көрдүм. Силер зор чеберчиликти, эрк-кайратты көрсөтүп, өлкөбүздүн намысы үчүн күрөштүңүздөр. 

Жеңишке жетүү оңой-олтоң жумуш эмес, анткени Олимпиада оюндарына төгөрөктүн төрт бурчунан топтолгон эң мыкты спортчулар катышат. Ар бир өлкө уул-кыздарынын эң күчтүүсүн, эң мыктысын, намыска жараган азаматын аттандырат. Алардын арасынан суурулуп чыгуу,  анан да  медаль утуу —  чоң ийгилик! 

Спортчулардын ийгиликтеринин башаты шык-жөндөмгө, кажыбас эркке, ошондой эле машыктыруучунун чеберчилигине негизделген. 

Спорттогу ийгилик — бул чоң эмгек, ошондой эле мекенчилдиктин үлгүсү. Анткени, Сиздердин жеңиш миңдеген жаштардын жүрөгүн толкутуп, илгери шыктандырат. Силерди өрнөк тутуп, силердей болгусу келгендердин катарынан далай чемпиондордун чыгышына ишенемин. 

Дүйнөлүк деңгээлдеги спорттук жетишкендиктер мамлекеттин мүмкүнчүлүктөрүнүн эң таасын көрсөткүчү. XXI кылымда күчтүү жана дени сак улут гана атаандаштыкка туруштук бере алат. 

Силер Кыргызстандын даңазасын  дүйнөлүк деңгээлде арттырдыңар», — деп айтты Мамлекет башчысы. 

Садыр Жапаров кыргыз курама командасынын башкы, улук жана биринчи машыктыруучуларына өтөгөн эмгеги, сабырдуулугу жана мээрими үчүн өзгөчө ыраазычылыгын билдирди.

«Сиздердин мээнетиңиздердин аркасында биздин спортчуларыбыз  ийгиликтерге жетишүүдө. 

Ошондой эле биздин спортчуларыбыздын ата-энелерине да ыраазычылык билдирем. Спортчулардын  өнүгүүсүндө ата-энелердин ролун баалоо кыйын, сиздер балдарыңыздардын спорттогу ийгиликтерине жана жыйынтыктарына чоң таасир этесиздер. 

Спортчу уул-кыздарыбыздын ийгиликтерине дагы көп ирет чогуу кубаналы. 

Урматтуу спортчулар, машыктыруучулар! Олимпиада оюндарында Кыргызстандын атын чыгарып, намыска жарадыңар. Силер Олимпиада оюндарынын медалдарына гана эмес, Кыргыз мамлекетинин жогорку сыйлыктарына да татыктуусуздар. 

Олимпиадалык команданын мүчөлөрүнө жана машыктыруучуларына чың ден соолук каалайм, жаңы жеңиштерди багындыра беришиңерге  тилектешмин. 

Жашасын, Кыргызстан!

Жашасын, кыргыз спорту!», — деп баса белгиледи президент Садыр Жапаров.

Олимпиадачылардын урматына кыргыз эстрада жылдыздарынын катышуусунда концерт болду. 

Эске салсак, Токио-2020 Олимпиада оюндары Кыргызстандын спорт тарыхындагы эң ийгиликтүү оюн болду. 

Балбандар Акжол Махмудов, Айсулуу Тыныбекова жана Мээрим Жуманазарова эки күмүш жана бир коло медалга ээ болуу менен мыкты натыйжаларды көрсөтүштү. 

Белгилей кетсек, бүгүн олимпиадалык команданын 11 мүчөсү өз Мекенине кайтып келишти, Японияда калган ата мекендик спортчулар бир нече күндөн кийин кайтышат. 

Жакын арада улуттук курама команда толук курамда чогулгандан кийин олимпиадачыларды жана машыктыруучуларды расмий түрдө сыйлоо иш-чарасы болот.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген

This site uses Akismet to reduce spam. Learn how your comment data is processed.