10 жаштагы кызды уурдап бара жаткан испаниялык адам кармалды

1-майда кыргыз-казак чек арасындагы «Акжол-автожол» өткөрмө бекети аркылуу өлкөдөн 10 жаштагы кызды чыгарып кетүүгө аракет кылган Испаниянын жараны кармалды. Бул тууралуу Мамлекеттик чек ара кызматынын коомчулук менен байланыш бөлүмү билдирди.

Маалыматка караганда, документтерди текшерүү маалында Испаниянын 1968-жылкы жараны шек жараткан. Ал берилген суроолорго жооп бербей, өзү дагы, кыз дагы орусча билбей турганын айткан.

«Бирок чек ара кызматкери кыздан орусча билесиңби деп сураганда ал ооба деп жооп берген. Териштирүүлөрдөн кийин буга чейин кыздын апасы ал жоголуп кеткендигин айтып, укук коргоо органдарына арыз менен кайрылганы аныкталды», — деп жазылган мекеменин билдирүүсүндө.

Мекемеден билдиришкендей, Испания жаранынын өлкөдөн чыгуусуна тыюу салынып, ИИМдин аймактык бөлүмүнө өткөрүлүп берилди.

Пикир калтыруу

Сиздин E-mail дарек жарыяланбайт! Керектүү талаалар жылдызча менен белгиленген